Həsrət notları
Biz həsrət notlarıyıq gülüm
Biz bir rəssamın çəkdiyi həsrətik gülüm
Səsimiz
sözümüz
və sevgimiz
bir uşağın gizli sigara
çəkdiyi qədər təhlükəlidir
Bizi körpəlikdə qara bələyə biliblər gülüm
Və beşiyimizdə tabut
məşqi öyrədiblər bizə
Öz dırnaqlarımızla belə öz dərimizi soyublar
Yalan hayqırıqlarımızla
kəfənləndiriblər bizi
Soyuq tərimizi torpağımız udubdur
Sağımızda xəncər belindəkilər
solumuzda qulağı tüklülər san gedir gülüm
Və arada əzilirik biz bir yumruq kimi
Böylədir bizdə əzginlik
Dünənimizi xəmir kimi oynadırlar əllərində
Bu günümüzü kündələyirlər sabahımızı yapmaq üçün
Biz burada
gülüşlərimizi yamsılamalıyıq onlardan
Və ağlamalarımızı gizlətməliyik gülüm
Tüpürcəyimizi utmağa
qorxu çiçəyi göyərir boğazımızdan
Əllərimiz zəncirlərlə adaxlanıb sanki
Biz
həsrət notlarıyıq gülüm
Yazılmışıq
alnımızdakı qırışlara
Biz...
...
***---------***
Aydın Araz
++++++++++
| 
