::::: İsmayıl Cəmili

Bahar gülür səndə gülüm gül barı

Gül, gətirsin ömrün günün gül barı

Qəmin dərdin qara dönsün ərisin

Yaz gətirsin sevdamızın pərisin

Qada qorxu qəm dumanı qovulsun

Dərd verənlər dərd içində boğulsun

Küsgün gülüş dodaq ilə barışsın

Yeni günlər arzımızdan danışsın

Gəlsin elə sevgi-sevinc anları

Gülə dolsun yurdumuzun baharı

Aşıq desin gözəlləmə dağlara

Can-can deyib can eşitsin yar yara

Vüsal gəlsin hicran dəmi sovuşsun

Ana diyar özgürlüyə qovuşsun

Pöhrə versin qızıl güllər dustaqdan

Adim-sanim can qurtarsın yasaqdan

Ana dildə bülbül desin sözünü

Öz ətrilə gül tanıtsın özünü

Yurdumuzun arzı yazın özlürük

El şənliyin el bayramın gözlürük

İsmayıl Cəmili

Bahar bayramı

2008

++++++++++