::::: İsmayıl Cəmili

Aşıq

Yenə yanıq kərəmi çal

Sazın əgər sazdı aşıq

Bu çəkilməz qurbət qəmin

Havalarda azdır aşıq

Ömür keçir yardan uzaq

Gül yerində əsir sazaq

Qurbət qurub qəmli duzaq

Çal kökünü qazdır aşıq

Qapı döyür şaxta duman

Diş qıcıdır soyuq zaman

Bitməyən qış kəsir aman

Bizim yerdə yazdır aşıq

Mizrab dəysin teldən telə

Gəzib çatsın bizim elə

Savalanda açan gülə

Nə söyləsən azdır aşıq

Təbriz, Bakı, Şəki, Şirvan

Xoy, Ərdəbil, Urmu, Zəncan

Bir ölkədir Azərbaycan

Sazın üstə yazdır aşıq

Aşıq çalır xan kərəmi

Ərir qurbət dərdi qəmi

Aşiqlərə hicran dəmi

Həmdəm olan szdır aşıq

Olsa vurğun kim elinə

Bağlı qalar öz dilinə

Cəmil üymaz yad gülünə

Öz gülünə bazdır aşıq

İsmayıl Cəmili

++++++++++