::::: İsmayil Cəmili

Birlik

Əl-ələ versəydi gecə ulduzlar

qadalı qaranlıq itib batardı.

Günəşlər doğardı saysız üfüqdən

uzanan zülməti işıq udardı.

Qol-qola versəydi zinə bulaqlar

çağlayıb səslənib dəniz olardı.

Gözləri yol çəkən quraqlıqların

həsrətli sinəsi doyub dolardı.

Səs-səsə versəydi yalnız haraylar

dağları oynadan tufan olardı.

Yarardı sinəsin zalim zindanın

zəncirlər qırılıb quşlar uçardı.

Əl-ələ, qol-qola, səs-səsə versə

tapdanan əzilən soyulan ellər

qudurqan qaranlıq quraqlıq qaçar

qurtuluş yazında açılar güllər.

----- ------- -----

İsmayil Cəmili

++++++++++