::::: İsmayıl Cəmili

Yaralı könlünü bir gün yar alar gec-tezi var

Etdiyi cor-o-cəfadən usanar gec-tezi var

Arzular gülşənini sarsada hicran xəzəli

Gül gülər bülbül oxur fəsli bahar gec-tezi var

Sel olan göz yaşıma baxmagilən tənə ilə

Vəsli cananə çatar aşiqi zar gec-tezi var

Əlini üzmə gilən yar ətəyindən a könül

Qəlbi daş olsada bir gün yumuşar gec-tezi var

Sanma ki çəkdi bizi çöllərə yersiz yerə yar

Edəcək qəmzəyə nazilə şikar gec-tezi var

Üzünə bağlı əgər olsada bəxtin qapısı

Döz, dözümlə tapılar bir gün açar gec-tezi var

Gecəyə əymə boyun üzmə səhərdən ümüdün

Məzlumun ahı qılar zülmü mahar gec-tezi var

Yurdumun gül üzünə qonsada qəm qüssə tozu

Hər daşı bir gün olar nəqş-nigar gec-tezi var

Sıxma canın görünən hali pərişaninə bax

Tutacaq şanlı yerin doğma diyar gec-tezi var

Yol açır şən sabaha himməti fərzanələri

Bu qaranlıqda ötər, gün də doğar gec-tezi var

İsmayıl Cəmili

++++++++++